ரூ.10.76 லட்சம் கோடியா கொடுத்தீங்க?...எங்கள் காதுகள் பாவமில்லையா? - முதலமைச்சர் விமர்சனம்

தமிழ்நாட்டிற்கு மத்திய அரசு ரூ.10.76 லட்சம் கோடி நிதி வழங்கியதாக கூறுவது அப்பட்டமான பொய்க்கணக்கு என முதலமைச்சர் மு.க.ஸ்டாலின் விமர்சித்துள்ளார்.

தனது X தளத்தில் இதுதொடர்பாக பதிவிட்டுள்ள அவர், கடந்த பத்தாண்டுகளில் தமிழ்நாட்டின் வளர்ச்சிக்காக ரூ.10.76 லட்சம் கோடியை அள்ளிக் கொடுத்ததாம் மத்திய பாஜக அரசு. இது அப்பட்டமான பொய்க்கணக்கு என விமர்சித்துள்ளார். 

அதோடு "மத்திய அரசு மாநில அரசுக்கு நேரடியாக வழங்கும் நிதி.
ஒன்றிய நிதிக் குழுவின் பரிந்துரையின்படி, மத்திய அரசு மாநில அரசுகளுக்கு அளிக்க வேண்டிய நிதிப் பகிர்வையும், திட்டங்களுக்காக மாநில அரசுகளுக்கு வழங்கப்பட வேண்டிய நிதியையும் உள்ளடக்கியது இது. இதன்கீழ், உத்தரப்பிரதேசத்துக்கு ரூ.18.5 லட்சம் கோடியை அள்ளிக் கொடுத்த பாஜக அரசு, பல லட்சம் கோடி ரூபாயை வரியாகப் பெற்ற தமிழ்நாட்டுக்கு கிள்ளிக் கொடுத்ததோ ரூ.5.5 லட்சம் கோடி மட்டுமே." என குறிப்பிட்டுள்ளார்.

"ஒன்றிய அரசு ஒரு மாநிலத்தில் நேரடியாக செயல்படுத்தக்கூடிய திட்டங்களுக்கான நிதி ஒதுக்கீட்டில், பாஜக காட்டியுள்ள பொய்க்கணக்குகள் என்னென்ன தெரியுமா?. இன்னும் ஒற்றைச் செங்கல் கூட எடுத்து வைக்கப்படாத மதுரை எய்ம்ஸ் மருத்துவமனைக்கு ரூ.1,960 கோடி, ஒரு ரூபாய் கூட நிதி விடுவிக்கப்படாத சென்னை மெட்ரோ ரயில் 2ம் கட்டப் பணிகளுக்கு ரூ.63,246 கோடி, சாகர்மாலா திட்டத்திற்கு ரூ.2 லட்சம் கோடி என ஒட்டுமொத்தத் தமிழ் மக்கள் காதிலும் பூச்சுற்ற நினைக்கிறது பாஜக அரசு." என தெரிவித்துள்ளார்.

"இந்தத் திட்டங்களின்கீழ் கடந்த 10 ஆண்டுகளில் தமிழ்நாட்டில் செலவழிக்கப்பட்டுள்ள நிதி எவ்வளவு,  விடுவிக்கப்பட்டுள்ள நிதி எவ்வளவு என்பதை எந்த பாஜக அமைச்சர்களாவது விளக்க முன்வருவார்களா?. இவற்றுக்கெல்லாம் மகுடம் வைத்தாற்போல் எடுத்து விடப்பட்டுள்ள அநியாயப் பொய் அடுத்தது. தம் உழைப்பாலும் தொழில் திறத்தாலும் தமிழ்நாட்டின் தொழில் வளர்ச்சிக்கு வித்திட்டுள்ள தமிழ்நாட்டின் சிறுதொழில் முனைவோர்கள் வங்கிகளில் வாங்கி, திருப்பிச் செலுத்த வேண்டிய ரூ.2.5 லட்சம் கோடி கடன்கள் அனைத்தையும் தாராளமாக நிதி வழங்கியது போல கூறிக்கொள்கிறது பாஜக அரசு. எத்தனை பொய்களைத்தான் நாடு தாங்கும்?. எங்கள் காதுகள் பாவமில்லையா"... இவ்வாறு முதலமைச்சர் மு.க.ஸ்டாலின் விமர்சனம் செய்துள்ளார்.